Met sy nuutste enkelsnit, “Rieks met sy Trieks”, bewys Armand Steenkamp weer dat hy presies weet hoe om ’n storie uit die hart van Suid-Afrika te vertel. Dis ’n liedjie wat nie net laat glimlag nie, maar ook herinner aan die tipe vriend wat elkeen van ons iewers in ’n vriendekring het – die ou met die streke, die groot mond, die nog groter hart, en die vermoë om altyd dinge reg te ruk.
Armand beskryf die liedjie eenvoudig: “Wees ’n lekker ou, moenie ’n suurpruim wees nie.” En dalk is dit juis daardie eerlikheid en eenvoud wat die lied so treffend maak.
“Rieks met sy Trieks” is geanker in die Noordwes – met verwysings na Vryburg, Simmentallers, Gaansvlakte en selfs die Gentleman’s Club. Maar hoewel die karakter diep gewortel is in ’n spesifieke wêreld, is die tema universeel.
Rieks is die man wat jou probleme “fix”, wat vir jou sal baklei in die straat, wat stout is maar lojaal, en wat sy lewe voluit leef. Hy speel gholf vir kaas en wyn, slaan sy balle skeef, maar daag steeds op – altyd. Dis daardie mengsel van menslikheid, humor en hart wat die liedjie dra.
Armand glo luisteraars sal maklik met die karakter kan vereenselwig:
“Daar is iewers nog so ’n pel in elke vriendekring – ’n yster met ’n hart van goud wat baie vir sy medemens doen.”
Soos met meeste van Armand se projekte was daar geen tekort aan lag tydens die skep van die lied en die musiekvideo nie. Hy is openlik daaroor dat musiek vir hom nie net werk is nie, maar iets wat geniet móét word.
“As ek nie my werk kan geniet nie, wil ek dit nie doen nie,” sê hy. “Daar is altyd gelag op my musiekvideo-stelle.”
Tog bly professionaliteit en radio-vriendelikheid belangrik. Die grootste uitdaging met “Rieks met sy Trieks” was nie produksie of uitvoering nie, maar die lirieke.
“Dis ’n lekker goedvoel-liedjie. Dit was moeilik om ’n storie daaragter te sit wat radio-vriendelik is. Maar ek hou my musiek eenvoudig. Ek probeer nie moeilike musiek maak nie – ek hou by wat eerlik voel.”
Die enkelsnit is opgeneem by Bold Media in Kaapstad, saam met Johan Mossel Fourie en Chris – ’n span wat al die afgelope ses tot sewe musiekvideo’s vir Armand vervaardig het.
Hierdie keer het hy besluit om ook die opname daar te doen, terwyl hy in die Kaap was. Die resultaat is ’n produksie wat vars, energiek en tog eg aan sy styl bly.
“Dit was vir my lekker om weer saam met hulle te werk. Daar is ’n goeie energie en ons verstaan mekaar se kreatiewiteit.”
Onder die humor en die binnegrappies lê ’n eenvoudige, maar kragtige boodskap: werk hard, wees lojaal, waardeer jou mense – en moenie jouself te ernstig opneem nie.
“In die sweet van jou aangesig sal jy jou brood verdien,” sing hy – ’n herinnering dat harde werk en karakter steeds saak maak.
“Rieks met sy Trieks” is uiteindelik meer as net ’n lekker kuierlied. Dis ’n viering van vriendskap, gemeenskap en daardie outentieke Suid-Afrikaanse gees wat nog glo in groet, lag, gesels en saamstaan.
En soos Armand dit self stel:
Wees ’n lekker mens.Dis eintlik so eenvoudig.
