Die vonke spat behoorlik wanneer die afrikaanse sanger en liedjieskrywer Brandon Miles, die nuutste ster in die Vonk Musiek-familie, sy splinternuwe enkelsnit “Stoppit Ek Like It” bekendstel. Hierdie energieke partytjie-treffer is gemaak om die dansvloere te vul en braaivure tot in die vroeë oggendure aan die brand te hou.
Met sy kenmerkende kombinasie van humor, romanse en daardie aansteeklike naweek-vibe, skep Brandon ’n lied wat jou onmiddellik in ’n goeie bui plaas. Van die eerste kitaar-aanslag af is dit duidelik – dis ’n song wat luisteraars laat glimlag, voete laat jeuk en harte vinniger laat klop.
Die uitdrukking “Stoppit ek like it” is lank al deel van Brandon se eie kleurvolle persoonlikheid. Nou het dit in ’n onweerstaanbare melodie verander wat sy aanhangers saam laat sing:
“Ek het dit nog altyd as ’n sê-ding gebruik, en ek het geweet dit gaan ’n lied word wat mense onmiddellik vang,” verduidelik hy.
Brandon het die lied saam met sy kreatiewe bondgenoot en goeie vriend Owald Vorster van Schalkwyk geskryf. Hulle gesamentlike energie en humor het ’n lied geskep wat ewe veel snaaks, flirterig en feestelik is.
Met inspirasie uit sy Afrikaanse musiekhelde, het Brandon daarop aangedring dat die lied ’n sterk beat en kragtige kitaarwerk moes hê – elemente wat dit die perfekte klankbaan maak vir feeste, padritte en braai-aande.
Volgens Brandon was daar nooit twyfel nie:
“Ek het van die eerste oomblik af geweet dis ’n partytjie-treffer. Ek wil hê mense moet nog voor die koor begin al lag en sê: ‘Nou raak dit lekker!’”
Die brug van die lied, sê hy, is sy trots: eenvoudig maar vars, en die vonkel wat die hele song sy ekstra lewe gee.
“Stoppit Ek Like It” is nie net ’n enkelsnit nie – dit is Brandon se manier om luisteraars te nooi na sy wêreld van vrolikheid, dans en vriendskap. Dit is ’n herinnering dat die wag verby is, die naweek aangebreek het, en dit nou regtig tyd is om lekker te kry.
