Met sy nuutste enkelsnit, “Sommer So”, bewys Wouter van de Venter weer dat eerlike, reguit Afrikaanse musiek steeds diep kan tref. Die lied is rou, eg en deurdrenk met ’n vasberadenheid wat soos ’n refrein deur elke vers klop: jy gaan nie lê nie – nie vandag nie, nie môre nie.
“Sommer So” het sy ontstaan gehad in Julie verlede jaar, ’n tyd wat Wouter doelbewus gebruik om te skryf. “Junie-maande is mos maar stil in die bedryf so ek gebruik gewoonlik daai tyd om te skryf,” vertel hy. Saam met twee ander liedjies – Poppe Dans en Jonk en Verlief – het “Sommer So” in daardie kreatiewe venster vorm aangeneem.
Hoewel die lied sterk emosies dra, is dit nie gebore uit een spesifieke gebeurtenis nie. Die gevoel van alles wat “onderstebo” draai, is eerder iets waarmee hy – en baie ander – gereeld kan identifiseer. “Ek voel, en ek is seker baie mense kan relate, nogal gereeld so,” sê hy.
Die beeld van ’n koue see en ’n storm staan sentraal in die lied. Dit simboliseer die moeilike tye wat elke mens beleef. “Nie alles is altyd maanskyn en rose nie,” verduidelik Wouter. “Maar dit hang van jou af hoe jy daardeur gaan kom.”
Daardie ingesteldheid kom sterk na vore in die lyn:
“Selfs as dit storm hou ek aan met loop.”
Vir Wouter is deursettingsvermoë nie onderhandelbaar nie. “As jy gaan lê is dit neusie verby, jy kan nie gaan lê nie!” sê hy met oortuiging. Dis hierdie “ek sal nie gaan lê nie”-mentaliteit wat die hart van “Sommer So” vorm.
Tussen die storms deur skyn daar ook lig. Die reël “more vat ek die wêreld oor” dra ’n boodskap van hoop en vasberadenheid. Dit is nie net liriek nie – dis ’n leefwyse. “Verseker,” antwoord hy wanneer hy gevra word of dit is hoe hy probeer leef, selfs op rowwe dae.
Hierdie positiewe energie gee aan die lied ’n opbouende gevoel. Dis nie ’n klaaglied nie; dis ’n opstaan-lied.
Wanneer Wouter sing “die liefde borrel hier in my bloed”, praat hy nie in metafore alleen nie. Die liefde waarna hy verwys is konkreet en persoonlik: sy vrou en familie. “My liefde vir my vrou en my familie is alles in my lewe,” sê hy.
Sy vrou, Anita, speel ’n sentrale rol in sy kreatiewe proses. “Anita, my vrou, is my grootste inspirasie deur my hele loopbaan.” Hierdie liefde gee nie net stabiliteit nie, maar ook die emosionele brandstof wat sy musiek dryf.
“Sommer So” bevat ook ’n skerp waarneming van die wêreld rondom ons. Met die woorde:
“Ek lag my dood vir hierdie wêreld met al sy leuns”,
maak Wouter dit duidelik dat mense self moet dink en ondersoek instel. Vir hom is dit belangrik dat luisteraars hul eie oordeel vorm en nie blindelings alles glo wat aan hulle voorgehou word nie.
Tog bly die lied positief. Dit is minder ’n ontsnappingslied en meer ’n herinnering dat jy self verantwoordelik is vir hoe jy deur die storm stap.
As hy “Sommer So” in drie woorde moet opsom, kies Wouter: “Real. Eerlik. Inspireer.”
En dit is presies wat die lied doen. Dit erken die rowwe dae, maar dit bly nie daar vassteek nie. Dit kies om vorentoe te beweeg – sommer so.
Wanneer die laaste note wegsterf, hoop Wouter dat mense positief sal voel. Dat hulle sal onthou die son skyn weer. Dat môre ’n nuwe kans bring.
En wanneer sê hy self meestal net “Sommer so” en stap aan?
“Ek dink daagliks.”
Met hierdie enkelsnit lewer Wouter van de Venter nie net ’n lied nie, maar ’n lewenshouding – een wat sê: al voel alles vandag onderstebo, môre vat ek die wêreld oor. Sommer so.
