Wanneer passie en doel mekaar vind, gebeur daar iets besonders. Dis presies wat plaasgevind het toe twee van die Afrikaanse musiekbedryf se platejoggies, DJ Elster en Afrikaans Wil Dans, saamgespan het om die geliefde Vrede-treffer “Tevrede” opnuut lewe te gee — met ’n remix wat reeds opslae maak.
“Ek het by Vonk Musiek aangesluit en kort daarna gevind dat ek ‘Tevrede’ oor en oor luister,” vertel DJ Elster met ’n glimlag. “Ek het dit vir my musikale vennoot, Afrikaans Wil Dans, gespeel, en hy het dadelik gesê: ‘Hierdie liedjie móét vir die groot verhoog geremix word.’”
Wat daarna gevolg het, was ure se laatnag-werksessies in die ateljee — ’n kreatiewe proses vol ritme, eksperimentering en inspirasie. Die resultaat? ’n Nuwe energie en massiewe klank wat die oorspronklike liedjie transformeer sonder om sy hart en boodskap te verloor.
Toe die eerste konsep voltooi was, is Vrede genooi om dit te hoor by Vonk Musiek se kantore.
“Ek was senuweeagtig,” onthou Elster. “Maar toe ek die volume opdraai en hul gesigte sien ophelder, het ek geweet — ons het iets besonders.”
Die “Tevrede (Afrikaans Wil Dans & DJ Elster Remix)” behou die oorspronklike stemme volkome en eer die emosionele kern van die lied. Wat nuut is, is die opbou, die aansteeklike energie, en die feestelike aanslag wat dit perfek maak vir dansvloere, feeste en die Desembervakansie. Dis ’n remix wat lig, vreugde en lewenslus uitstraal — presies wat Suid-Afrikaanse somers nodig het.
Francois van Vrede deel:
“Aanvanklik was ons maar skepties oor ’n remix, want Vrede is ’n baie organiese groep wat fokus op lirieke en gevoel. Maar toe ons die remix hoor, het ons geweet — dis iets besonders. Dit doen nie net die lied geregtigheid nie, dit verhef dit. Ons is ongelooflik dankbaar teenoor Elster vir sy inisiatief, en trots om saam met sulke talentvolle kunstenaars te werk. Nou het ons ’n projek waarby Vrede, Elster, Afrikaans Wil Dans én Loki Rothman betrokke is — ’n eer!”
Storm voeg by:
“Ons kom uit ’n singer-songwriter-agtergrond, so ons was aanvanklik huiwerig. Maar nadat ons met Elster gesels het oor sy proses, het ons regtig opgewonde geraak. Toe ons uiteindelik die remix hoor, het dit net reg gevoel. Ons is trots om deel te wees van iets wat mense beslis gaan laat beweeg en glimlag.”
Die Tevrede Remix beloof om dansvloere landswyd aan die brand te steek en beide Vrede-aanhangers en dansmusiekliefhebbers saam te bring in een magiese samekoms van klank, gevoel en energie.
Tevrede (Afrikaans Wil Dans & DJ Elster Remix) is nou beskikbaar op alle groot digitale platforms. Voeg dit by jou somer-speellys — want hierdie een gaan jou nie net laat dans nie, maar ook laat tevrede voel.
