Tussen die konstante geraas van die nuus, ekonomiese druk en die daaglikse gejaag om by te bly met die bure, voel dit deesdae amper asof ons almal in ’n permanente staat van “veg of vlug” leef. Ons druk onsself dikwels tot op die rand van finansiële uitputting vir die spogmotor, die weelderige vakansie of die prentjiemooi lewe wat almal moet sien. En wanneer iets skeefloop, voel dit maklik asof alles rondom ons in duie stort.
Maar wat as ons net vir ’n oomblik kies om uit die snelbaan te klim?
Dít is presies die boodskap agter die splinternuwe, aansteeklike enkelsnit, “Saki Maki”, deur die dinamiese duo Leon Gropp en Christiaan Baartman.
Met hierdie vars vrystelling snoer Gropp en Baartman weer kragte saam om ’n prettige, eerlike en tog betekenisvolle perspektief op vandag se gejaagde lewe te bied. Die liedjie is deur Baartman self geskryf en vervaardig, met Gropp wat ook tot die lirieke bygedra het.
“Saki Maki” is ’n uitdaging aan enigiemand wat vasgevang voel in druk, verwagtinge en die daaglikse stres van die lewe. Dit herinner luisteraars om vir ’n oomblik stil te raak, asem te haal en weer te fokus op die dinge wat werklik saak maak. Want wanneer die belangrike dinge in plek is, verloor die klein jakkalsies hul houvas.
Die snit vorm deel van Baartman se persoonlike uitdaging om vanjaar elke maand ’n nuwe liedjie op te neem. Dit is in sy eie ateljee, Bearded Man Studios, geskep en lê hom besonder na aan die hart. Met ’n loopbaan van meer as twee dekades agter sy naam, bewys Baartman weereens dat hy ’n kragbron is wanneer dit kom by skryf, vervaardiging, mengwerk en bemeestering.
Volgens Baartman voel “Saki Maki” vir hom soos ’n moontlike vlagskip-liedjie vir die jaar — ’n snit wat direk praat met die realiteit waarin baie Suid-Afrikaners hulself tans bevind.
Musikaal is “Saki Maki” ’n organiese, lekkerluister-liedjie met energieke blaasorkes-klanke wat sommer dadelik ’n positiewe gevoel oor die lewe skep. Dit is die perfekte musikale herinnering om die oppervlakkige dinge te laat gaan, die stres af te skud en weer ligter te leef.
Hou beslis jou ore oop vir “Saki Maki” op die luggolwe, en verwag nog baie meer deurdagte, opgewekte musiek van Christiaan Baartman in die komende maande.
