Die geliefde Afrikaanse kunstenaars Andriëtte en Herman Kleinhans het kragte saamgesnoer om die intense en beeldryke lied, “Napoleon”, as ’n duet vry te stel. Die lied, met lirieke geskryf en getoonset deur Steve Hofmeyr, bied ’n emosionele en dramatiese blik op liefde, konflik en die misterie van standvastigheid in verhoudings.
Die lirieke van “Napoleon” verwys na groot figure soos Napoleon, die pous, die president, De Wet en Fleur – beelde wat ’n diep simboliese betekenis dra. Volgens Herman Kleinhans verteenwoordig die simboliek die onsekerheid wat elke mens in homself dra, en herinner dit ons daaraan dat dit almal se realiteit is. Andriëtte voeg by dat die gebruik van hierdie karakters ’n kragtige boodskap gee oor die uithouvermoë en krag van die liefde.
Die refrein, “My liefling, hoekom bly jy staan”, word telkens herhaal en is die hartklop van die lied. Vir Herman is dit ’n verwondering oor mense wat, ten spyte van alles, kies om te bly. Andriëtte beskryf dit as die dinamiek van ’n verhouding waar die een minder gee, maar die ander steeds kies om aan die verhouding vas te hou.
Hoewel “Napoleon” oorspronklik as ’n solo-lied bestaan, het die duetformaat die lied verdiep en nuwe betekenis gebring. “Ons stemme bring nostalgie en diepte,” sê Andriëtte, “en deurdat dit nou uit beide ’n man en vrou se oogpunt vertel word, kry die lied ’n unieke emosionele balans.” Herman beklemtoon dat dit bloot ’n besonder mooi lied is wat ’n nog mooier vertolking gekry het deur hul samewerking.
Vir beide kunstenaars was dit ’n spesiale en opregte ervaring om saam aan die lied te werk. Herman beskryf hoe die oomblik van egtheid gekom het in die doodsnikke van die lied – die intense herhaling van die refrein. Andriëtte vertel dat hulle eers toe al die elemente saamgevoeg is, die volle dinamiek van die duet ten volle verstaan het.
Hoewel die tema van liefde en konflik tydloos is, glo Andriëtte dat dit ook die huidige tydsgees aanspreek, veral omdat mense deesdae minder geneig is om vas te klou en deur te druk. Herman meen dat ons slegs kan raai wanneer dit by antwoorde van die liefde kom – ’n beskeie erkenning van die raaiselagtige aard van verhoudings.
“Napoleon” is ’n lied wat nie net ’n sterk liriese verhaal vertel nie, maar ook die luisteraar in ’n wêreld van simboliek, emosie en standvastigheid intrek. Met Andriëtte en Herman se unieke stemme en opregte interpretasie, word dit ’n duet wat ongetwyfeld die harte van Afrikaanse musiekliefhebbers sal aanraak.
