Met sy jongste vrystelling, “Trap Diep”, bring Jan Rhaap ’n energieke partytjie-banger wat ewe veel speelsheid en trefkrag bevat. Die lied, vol beeldryke lirieke en ’n aansteeklike refrein, is geskryf om mense se harte en voete te vang – en dit met groot sukses.
Die begin, “Kyk die kat uit die boom uit, ek ken die gevoel, ek ken daai kyk”, spruit uit ’n bekende kuier-ritueel. Volgens Jan is dit daardie tipiese gevoel net voordat jy saam vriende gaan uitgaan: die plan is dalk net ’n vinnige drankie of twee, maar almal weet dit gaan nooit daar eindig nie. Hierdie voorspelbare onvoorspelbaarheid loop soos ’n goue draad deur die lied.
Hoewel hy die reël “Hierdie storie loop vooruit, ons weet wat kom” sing, sê Jan dat hy self nog nooit regtig sulke voorgevoelens gehad het nie – behalwe miskien ’n bietjie déjà vu.
Die lyn “Dis ’n TikTok bom” is nie geskryf met virale sukses in gedagte nie. Jan verduidelik dit eerder as ’n verwysing na die realiteit dat geen aand saam met vriende vandag verbygaan sonder dat iets daarvan op sosiale media beland nie.
Die lirieke sluit ook partytjie-rituele in, soos “Sit jou foon op flight mode” en “bring ’n suurlemoen en ’n potjie sout”. Hier speel Jan met die idee dat mense meer tyd moet spandeer in mekaar se geselskap, sonder die afleiding van fone – en natuurlik is tequila nooit ver weg nie.
Die refrein “Trap diep, trap plat” verteenwoordig vir Jan twee kante van dieselfde munt. “Trap diep” dui op vasstaan en jou plek hou, terwyl “Trap plat” die momentum en energie van die kuier simboliseer – daardie oomblik wanneer die doppe begin rol en die party regtig aan die gang kom.
Vir Jan is die lied beslis ’n partytjie-banger eerder as net ’n road trip anthem. Dit’s die tipe snit wat jy vol volume wil gooi in die middel van ’n kuier.
Beelde soos “sit jou glasie neer, hierdie ys gaan spat” en “kort kort glasies, manne wat lag” gee die song ’n amper filmiese gevoel. In die ateljee het Jan saam met sy vervaardiger, Tertius Human, gewerk om ’n balans te hou tussen die komiese en die musikale elemente. Die doel was om die lag en spontane energie van ’n kuier vas te vang – en dit voel of hulle dit reggekry het.
Met die reël “Dis ’n hondeskou” beskryf Jan die deurmekaar energie wanneer ’n kuier teen sy klimaks beland. Dit is daardie stadium van die aand waar alles ’n bietjie losser, harder en onbeheerbaar raak – ’n beeld wat perfek by die toon van die lied pas.
“Trap Diep” gaan sonder twyfel ’n hoogtepunt in Jan Rhaap se live vertonings wees. Van die begin af was dit een van die doelwitte in die ateljee: om ’n lied te skep wat die gehoor laat opstaan en saam laat sing. ’n Musiekvideo is ook reeds in die beplanning, en luisteraars kan uitsien na tonele wat die lirieke se humor en atmosfeer lewendig maak.
Meer as enigiets hoop Jan dat die lied ’n glimlag op mense se gesigte sit. Hy wil hê dat dit luisteraars moet laat uitsien na die volgende kuier saam met hulle vriende – daardie kosbare oomblikke wat jy nie kan herhaal of namaak nie.
Met “Trap Diep” het Jan Rhaap weer bewys dat hy die kunstige vermoë het om ligsinnigheid, humor en musiek te kombineer in ’n pakkende snit wat lank ná die laaste noot in jou kop bly vassteek.
