Wanneer twee kragtige musikale stemme saamvloei, gebeur daar iets besonders. Stephan Visagie en Amoré se nuutste enkelsnit, “Heart on the Line”, is presies so ’n oomblik – ’n samesmelting van rou emosie, hoopvolle lirieke en ’n melodie wat lank ná die laaste noot in jou kop bly speel.
Hoewel die begin – “It seems like I’ve been here before / A lover’s trap” – klink soos ’n dagboekinskrywing vol persoonlike pyn, beklemtoon Stephan dat die inspirasie fiktief is. Tog is dit ’n universele probleem: liefde met sy onvermydelike kopsere. “Ons almal gaan een of ander tyd deur daardie siklus van hoop en teleurstelling,” sê hy.
Die tema van gebroke liefde wat steeds plek maak vir nuwe kanse, was doelbewus gekies. Stephan beskryf homself as ’n natuurlik positiewe mens: “Daar is altyd lig aan die einde van die tonnel… as daar nie hoop is nie, bly daar nie veel oor nie.” Hierdie ingesteldheid vorm die ruggraat van die lied – ’n oproep om aan te hou probeer, al het jy al geval.
Die herhalende frase uit die koor dien as emosionele spilpunt. Vir die kunstenaars beteken dit om weer en weer jou hart op die spel te plaas, selfs na teleurstellings. “Dis soos fiets ry,” verduidelik Stephan. “Jy klim op, val, stof af, en probeer weer – tot die regte liefde op die regte tyd verby kom.”
Met die lirieke “Hearts ain’t meant to be broken forever” maak die lied ’n standpunt oor verhoudings. Vir Stephan is liefde iets wat meer as twee kanse verdien: “’n Hart word heel gemaak deur liefde, maak nie saak hoeveel keer dit probeer en seer kry nie.”
“A fire burns / Deep down in my veins” bring ’n beeld van intensiteit wat Amoré se stem perfek dra. Volgens Stephan het hulle besluit sy moet dié deel sing om die passie te beklemtoon. Die produksie is eenvoudig gehou – die lirieke en emosie is sterk genoeg om hul eie visuele prent te skep.
Musikaal is daar ’n dramatiese skuif ná ’n stil koor. Stephan is lief vir sleutelveranderings omdat dit “oomf” gee en fokus op ’n spesifieke boodskap. Dit is een van sy gunsteling tegnieke in popmusiek.
Die pad tot hierdie duet was lank in wording. Stephan wou al jare saam Amoré werk, maar ’n toevallige ontmoeting via ’n familielid het die deurbraak gebring. “Ek het haar sommer daar en dan gevra, en gelukkig het sy ingestem. Mense sê ons stemme pas baie goed saam.”
Stephan het die lirieke geskryf, met Jade van Storm Productions wat die melodie bygedra het. Johan van Bold Lab Productions het die finale stemopnames en produksie hanteer, en saam met Amoré besluit wie watter dele sou sing.
Beelde soos “Lighting up the sky / Sweeping through the night at the speed of light” beskryf verliefdheid as ’n veldbrand – helder, intens, maar ook gevaarlik. Al is daar nog nie ’n musiekvideo nie, hoop die kunstenaars om die visuele energie eendag vas te vang sodra logistiek dit toelaat.
“Heart on the Line” is meer as net ’n liedjie – dis ’n uitnodiging om weer te waag, om jou hart oop te maak ten spyte van vorige wonde. In ’n wêreld waar liefde soms broos voel, herinner Visagie en Amoré ons dat daar altyd nog ’n kans is… en dat dit die moeite werd is om jou hart op die spel te plaas.
